Фрилансер жана Ысык-Көл облусун өнүктүрүү фондунун басма сөз катчысы Алена Хоменкону сотко беришти. Каракол шаардык сотуна доо арыз менен Пристань-Пржевальск конушунун жашоочусу Фатима Тагаева кайрылган. Ал А.Хоменкону алдамчылыкка айыптоодо жана андан 5 млн сом өндүрүп берүүнү талап кылууда.
Сотка кайрылууга Фейсбукта жарыяланган пост себеп болгон. Мурда Хоменко жер талашы жөнүндө соттук жараянды чагылдырган жана тараптардын биринин өкүлү катары чыккан. Экинчи тарап Ф.Тагаева болгон.
А.Хоменко Фейсбуктагы постунда тараптардын биринин сөзүнө таянып, талаш-тартыштын себептери жана соттук жараян кандай өткөнү жөнүндө жазган. Постто ысымдар жана фамилиялар көрсөтүлгөн эмес, алардын баш тамгалары гана берилген. Пост чыккандан кийин Ф.Тагаева А.Хоменкону «жалаа жапты» деп айыптап сотко кайрылган, ошондой эле, Өнүктүрүү фондуна А.Хоменконун алдамчылыгы жана анын мурда соттолгондуугу жөнүндө кат менен кайрылган.
Сот бул кайрылууну кароого кабыл алды. Биринчи жыйынды жаңы жылда өткөрүү пландалды.
А.Хоменкого Ысык-Көл облусун өнүктүрүү фондуна соттуулугу жоктугу тууралуу маалымкат алып барганга туура келген.
«Биз азыр Тагаеванын катыштыгы бар Пристань-Пржевальск конушундагы кыймылсыз мүлктү мыйзамсыз сатуу фактысы жөнүндө журналисттик иликтөө жүргүзүп жатабыз. Ошондой эле ага шаардын жана Муниципалдык мүлктү башкаруу департаменин кызмат адамдары аралашкан. Азыр жыйынтыгын айтууга эрте. Бирок Тагаева биз утуп алган жер талашы үчүн мага ачууланып жүрөт», – деп билдирди А.Хоменко.
Ал эми Ф.Тагаеванын айтымында, анын эч кандай алдамчылыкка тиешеси жок, тескерисинче, социалдык объекттерди мамлекетке кайтарып берүүгө жардам берип жүрөт.
«Ал (Хоменко) мага эч ким эмес. Мени билбей туруп, ал мени Фейсбукта «улутчул жана алдамчы» деп жалаа жапты. Мен сотко Хоменкодон 5 млн сом өндүрүп берүүнү жана посту өчүрүүсүн сурап кайрылдым», – деди Ф. Тагаева.
Ф.Тагаеванын аракетин А.Хоменко ээн баштык жана алдамчылык катары баалайт. Ал ШИИБге жалаа жабуу боюнча каршы арыз жазды.
Нургуль Шаршембиева,
«Журналисттер» КБнын Ысык-Көл облусундагы өкүлү
