13-майда «Азаттык» радиосунун журналисти Ыдырыс Исаков жана «Нур» телеканалынын журналисти Даткабек Шабданбековге кол салуу болду. Журналисттердин бети-колдору сыйрылып, колдору кайрылган.
Алар Ош шаарындагы «Делюкс» мейманканасынын капталында жайгашкан кумаркана делген жай чын эле иштеп жатканын тактоо үчүн барышкан.
Даткабек Шабданбековдун айтымында, эртеӊ менен Ноокат районунун тургунубуз деген 2 жаран келип, уулу кумарканага 350 миӊ сомун уттуруп жибергенин, Ошто көмүскө кумарканалар дагы деле иштеп жатканын айтып кайрылган.
«Бизди ал имаратка күзөтчү атайын аппараттар менен текшерип, ичкери киргизди. Киргенден кийин акчасын уттуруп жиберген жаран менен сүйлөшүп жатканбыз. Бир убакта Ыдырысты сыртка түртүп чыгарышты да, менин колуму кармап, тартып жаткан видеону өчүрүп салышты. Ал жерде 1 күзөтчү жана 3 аял бар эле. Кийин телефон чалышканда, дагы 2 күзөтчү келип кошулду», – деди «Нур» телеканалынын журналисти Даткабек Шабданбеков.
Бул окуя Ыдырыс Исаковдун түз эфирде тарткан видеосу аркылуу коомчулукка белгилүү болду.
«Мен түз эфирди жандырып койдум. Себеби, бул окуяны түз эфир аркылуу башкалар да көрсүн дегем. Кол салгандар менин телефонумду да тартып алууга аракет кылышты», – деди «Азаттык» үналгысынын журналисти Ыдырыс Исаков.
Милиция кызматкерлери окуя болгон жерге келип, журналисттерге кол көтөргөн 2 күзөтчүнү сурак жүргүзүү үчүн алып кетишти.
Ыдырыс Исаков ага күч колдонуп, телефонун тартып алган күзөтчүлөргө карата доосу жок экендигин, бирок «Делюкс» мейманканасынын имаратындагы казино уюштуруу фактысына жана мыйзамыз иш жүргүзүп жаткан казинолордун ишин байкабай отурган кызмат адамдарына укуктук баа берилүүсүн сурап Ош шаардык Ички иштер башкы башкармалыгына арыз жазды.
2012-жылдын башынан тарта Кыргызстанда казино жана кумар оюндарына тыюу салынган. Ош шаардык ИИББ маалымат катчысы Замир Сыдыков билдиргендей, жыл башынан бери ОИИБга «Делюкс» имаратындагы кумаркана иштеп жатканы боюнча 3 жолу ыкчам маалымат түшкөн.
Гүлзат Газиева,
«Журналисттер» коомдук бирикмесинин Оштогу өкүлү
