«Журналисттер» коомдук бирикмеси ЮНЕСКОнун Коммуникацияны өнүктүрүү боюнча эл аралык программасынын (IPDC) колдоосу менен Кыргыз Республикасынын медиа кызматкерлери үчүн коопсуздук боюнча практикалык материалдарды даярдады.
Колдонмолор өзгөчө кырдаалдарда жана кооптуу аймактарда иштеген журналисттердин физикалык, санариптик жана психологиялык коопсуздугун камсыздоого багытталган. Материалдар КР ӨКМдин Кырсыктар медицинасы кызматынын, IT-коопсуздук боюнча адистердин жана «Журналисттер» коомдук бирикмесинин сунуштамаларынын негизинде иштелип чыккан.
Материалдар топтому төмөнкүлөрдү камтыйт:
- өзгөчө кырдаалдар зонасында иштөөдөгү тобокелдиктерди баалоо, иш сапарга даярдануу, коопсуз жүрүм-турум жана биринчи жардам көрсөтүү боюнча сунуштар;
- жеке маалыматтарды жана маалымат булактарын коргоо, ишенимдүү сырсөздөрдү түзүү, эки факторлуу аутентификацияны колдонуу, мессенжерлерди коргоо жана фишингге каршы туруу боюнча көрсөтмөлөр;
- психологиялык туруктуулукту сактоо, стрессти башкаруу жана эмоционалдык чарчоонун алдын алуу ыкмалары;
- өзгөчө кырдаалдар зонасына чыгар алдында, иш учурунда жана сапардан кийин колдонууга ылайыкталган практикалык чек-листтер.
Бул материалдар журналисттерге гана эмес, редакторлорго жана медиа уюмдардын жетекчилерине да коопсуз иш шарттарын уюштурууга жардам берет.
Физикалык, санариптик жана психологиялык коопсуздук боюнча колдонмолорду, ошондой эле практикалык чек-листтерди жогорудагы шилтемелер аркылуу жүктөп алууга болот.